Cebuano News: 280 ka libo ka drivers nalista sa LTFRB SAP
TAGBILARAN CITY, Bohol, April 24 (PIA) — Kinatibuk-ang 280 ka libo ka mga drivers sa tibuok nasud ang nalista sa Land Transportation Franchising and Regulatory Board (LTFRB) ug kansang mga pangalan ila na nga giduso ngadto sa Department of Social Welfare and Development (DSWD) alang sa mga drivers sa mga sakyanan’g pangpubliko.
Kini, pasabut sa LTFRB, tungod kay ang DSWD ang natahasan ni Presidente Rodrigo Duterte nga nag-unang ahensya nga mopatuman ug mogunit sa pondo sa Social Amelioration Program (SAP) nga nalatid sa Bayanihan To Heal As One Act, ug kon diin, ang pagpanghatag og ayuda sa mga drivers sa mga pangpublikong sakyanan nga apektado sa gipatuman nga enhanced community quarantine.
Kahinumduman nga una na nga gahimog kasabutan ang DSWD, ang LTFRB ug ang Landbank of the Philippines (LBP) aron ilang ipadagan ang programa sa pagpanghatag sa ayuda nga pinansyal sa mga drivers.
Segun sa kasabutan, ang LTFRB maoy mag-andam sa mga listahan sa mga drivers sa pangpublikong sakyanan ug kini iduso ngadto sa DSWD aron matandi ang mga pangalan sa mga banay sa driver nga posible nga nakadawat sa ubang hinabang aron ma counter check.
Ang LBP usab maoy mohatag sa mga driver sa hinabang nga cash nga gikan sa pundo nga gihagbong usab sa DSWD.
Matud sa LTFRB, ang mga pangalan sa mga benepisaryo didto nila kuhaa sa mga mitapos sa LTFRB Drivers’ Academy Program Database, mga driver nga sakop sa mga kompanya sa Public Utility Vehicles sama sa mga bus, kooperatiba, kahugpungan sa mga transport, sakop sa mga Transport Network Vehicle System.
Dugang pa sa LTFRB, nahuman na nila og duso ngadto sa DSWD ang listahan.
Sagun pa sa mga tinubdan gikan sa LTFRB, kasamtangan pang gipailawom sa makuti nga counterchecking ug validation ang listahan aron maseguro nga walay magdoble nga ayuda alang sa usa ka tawo.
Matud pa, subayon sa DSWD kon ang driver nga wala ba malista sa ubang mga programa sa ayuda sa goberno sama sa 4Ps, cash assistance gikan sa DOLE CAMP, ug ubang hinabang. Kini, dugang sa tinubdan, dili dali nga pagcountercheck, ug kon may batch nga mahuman, dinhi pa himoan sa DSWD sa payroll aron maoy paseguan sa pundo nga ihagbong ngadto sa LBP.
Human sa paghimo sa DSWD sa payroll alang sa drivers nga hatagan sa ayuda, ihatag ang masterlist nga nahimo sa DSWD ngadto sa LTFRB ug sa LBP aron ikapamantala sa publiko ug mapahibaw ang driver sa iyang ayuda.
Sa higayon nga mabasa na sa driver ang iyang pangalan sa masterlist, mahimo na siya nga moadto sa LBP aron makuha ang iyang cash assistance.
Hinuon, kinahanglang bitbit sa driver ngadto sa LBP ang iyang valido nga lisensya, photocopy niini nga pirmahan usab sa driver sa makaduha.
Kon pananglit walay lisensya ang driver kay nadakpan sa Land Transportation Office, mahimo siyang modala sa itang Temporary Operators Permit, photocopy niini ug duha niya ka pirma.
Mipahinumdom usab ang LTFRB, samtang wala pa mogawas ang pangalan sa driver sa listahan nga makita online sa ilang facebook page sa LTFRB, dili una moadto sa LandBank.
Tumong sa tulo ka ahensya nga himoong dayag, sayun ug tataw ang proseso sa ayuda aron sayun ra nga makuha ug kamenosan ang pagtapok sa mga tawo, kay kini supak sa social distancing. (rahc/PIA-7/Bohol)
source https://pia.gov.ph/news/articles/1039922