Cebuano news: AAH nagpadayon sa paghatag ug suplay sa tubig sa mga IDPs
MARAWI CITY, Abril 23—Bisan paman nga naay limitasyon sa mga kalihukan tungod sa pag-implementar sa Enhanced Community Quarantine nga gipatuman sa Marawi City ug Lanao del Sur, ang Action Against Hunger (AAH) nagpadayon paghatud ug suplay sa tubig para magamit sa mga internally displaced persons (IDPs) sa lungsod.
Ang International Committee of the Red Cross (ICRC) naghatag ug dugang 15-metros nga ‘spiral hose’ niadtong Abril 18, 2020. Kini aron mapalapdan pa sa AAH ang pagbutang ug dugang suplay sa tubig paingon sa COVID-19 nga mga ‘isolation’ nga pasilidad sa probinsya.
Adunay kinatibuk-an nga 10 cubic meters nga tubig ang ihatud matag adlaw paingon sa ‘isolation’ nga pasilidad nga naa nahimutang sa Purok Badak, Barangay Emie Punod.
Hangtod karon, ang AAH padayon nga naghatag serbisyo sa paghakot sa tubig alang sa 218 ka mga pamilya nga naa sa Rorogagus Transitory Shelter Site.
Tungod kay ang tubig mahinungdanon man kaayo nga sangkap batok sa sakit nga virus, gidugangan pa sa AAH ug laing 10 cu.m. ang suplay kada adlaw. Gikan sa 30 cu.m nga target matag adlaw, karon naa na sa 40 cu.m ang ilang ihatud matag adlaw sa Transitory Sites.
Ang pagpadayon niini nga mga serbisyo nahimo tungod sa koordinasyon tali sa Provincial Local Government Unit Lanao del Sur, ICRC, Task Force Bangon Marawi ug National Housing Authority. (Bernadith G. Epan/PIA-ICIC)
source https://pia.gov.ph/news/articles/1039780