Cebuano news: Barangay sa Bukidnon gi-lockdown human gikumpirma sa DOH ang unang kaso sa COVID-19

VALENCIA CITY, Bukidnon, Abril 13 (PIA)—Ang Barangay Lumbayao sa Valencia City, Bukidnon gi-deklarang ‘lockdown’ human nahibal-an nga ang usa ka 50-anyos nga opisyal sa barangay ug negosyante nag positibo sa sakit nga coronavirus 2019 (COVID-19).

Si vice mayor Policarpo Murillo, head sa Emergency Operations Response Team, ang miingon nga adtong adlaw’ng Huwebes Santo, Abril 9, lang nila nasayran ang kahimtang sa pasyente sa dihang nadawat nila ang resulta sa laboratory. Ang pasyente karon gipailawom sa istrikto nga ‘home-confinement’.

Ang mga lokal nga awtoridad sa panglawas miingon nga kaniadto, ang pasyente gi-pailawom na sa ’Person Under Investigation kon PUI’ o ‘suspetsado (sa bag-o nga kalsipikasyon)’ ug gitambagan nga magpabilin sa balay sumala sa protocol sa Inter-Agency Task Force.

Pero tungod kay usa man siya ka opisyal sa barangay ug naay lain-laing negosyo sama sa quarry, umahan, tindahan, trading, ug uban pa, wala niya matuman ang mga mando sa lokal health authorities kon lokal nga awtoridad sa panglawas ug kinatibuk-ang mga mando sa gobyerno.

Nag-apil pa man gani siya sa usa ka dako nga Cock Derby sa Matina, Davao City kaniadtong Marso 12.

Atol sa press conference, gi-detalye ni Valencia City Mayor Azucena Huervas ang uban pa nga mga gihimo sa pasyente sukad siya mibalik sa ilang balay niadtong Marso 13.

Matud niya nga ang pasyente nagpakita ug mga simtomas sama sa dili grabe nga ubo, hilanat, ug pagkalibanga mga pipila lang ka adlaw gikan sa iyang pag-abot sa ilang balay. Tungod sa iyang mga gipangbati sa lawas, kaniadtong Abril 2, ang pasyente mi-uyon nga magpailawom sa ‘swab’ para sa COVID-testing.

Ug pagka Abril 9, usa ka semana human sa swab test, gipagawas sa Department of Health (DOH) ang resulta nga ang pasyente nag positibo sa COVID-19.

Diha-diha, gi-isyu dayon sa mayor ang Executive Order No. 31 sa pagbutang sa barangay Lumbayao ubos sa “total lockdown” sugod Abril 9 hangtud Abril 26, ug gipatuman ang 24-oras nga curfew alang sa mga menor de edad ug mga senior citizen aron mapugngan ang pagkaylap sa COVID-19.

Giklaro ni Huervas nga ang ‘total lockdown’ nagpasabot nga mas istrikto ang mga lakang, pamaagi, ug giya diha sa pagpatuman sa ‘enhance community quarantine’ sumala sa mga mando nga nakabutang sa mga gi-isyu nga executive order.

Gipasalig sa mayor nga ang local government unit (LGU) karon naghimo na sa ‘contact tracing’ aron masiguro nga ang tanan nga nakig-halubilo sa pasyente ma-isolate gyod aron malikayan ang pagkaylap sa coronavirus.

“Karon nga naa nay una nga nag-positibo sa COVID-19 sa probinsya sa Bukidnon, nga gikan sa lungsod sa Valencia, subli-on ko ang akong mando ug hangyo sa mga residente nga magpuyo sa balay — gawas sa pipila ka mga kahimtang — aron mapugngan ang pagkaylap sa COVID-19,” miingon si Huervas.

Kung dili nato mahimo ang boluntaryo nga kooperasyon, ang LGU andam kanunay aron ipatuman ang ‘orders and restrictions’ pinaagi sa pagdakop sa mga supakero,” dugang niya.

Kaniadtong Abril 8, usa ka adlaw sa wala pa ang resulta gikan sa DOH nga dunay nagpositibo sa COVID, si Gov. Jose Maria Zubiri Jr nag-awhag sa tanan nga magpabilin sa sulod sa balay tungod kay sugod Abril 13 hangtud Abril 26, ang mga border kon utlanan nga mga lugar sa Bukidnon ipa-sirado na ug wala nay ipalusot — gawas sa mga trak nga nagkarga sa pagkaon ug mga tambal.

Hinuon, gipasabot sa gobernador nga ang usa ka miyembro sa pamilya gitugotan nga mogawas aron makapalit sa ilang mga panginahanglanon sama sa pagkaon o tambal. Gipasidan-an pa niya nga dakpon ang mga molapas ug dili mo-tuman sa balaod.

Sa kasamtangan, ang Bukidnon nakatala ug 21 Persons Under Investigation (suspect); 1,347  ka Persons Under Monitoring; 1 ka kumpirmado’ng COVID-19 positive; ug walay namatay.

Base sa interbyu sa mga media sa mga ka-barangayan, ang katawhan miingon nga “ang pag mando ni Gov. Zubiri nga mag lockdown, usa ka maayong desisyon labi na karon nga ang probinsya nag-atubang sa problema kabahin niining COVID-19 tungod kay naa nay nakit-an nga nag-positibo niining kuyaw nga sakit. (BGEpan/RLRB, PIA Bukidnon)

source https://pia.gov.ph/news/articles/1038788