Cebuano News: BARMM nag-awhag nga proteksyonan ang kinaiyahan taliwala sa COVID-19
MARAWI CITY, Abril 23 (PIA)—Ang Bangsamoro Autonomous Region in Muslim Mindanao (BARMM), pinaagi sa Ministry of Environment, Natural Resources, and Energy (MENRE), nag-awhag sa publiko nga motabang pagpanalipod sa kinaiyahan, bisan pa nga nagpadayon ang epidemya sa coronavirus disease 2019 (COVID-19) nga nakaapekto sa kalibutan.
Ang BARMM Executive Secretary ug Ministro sa MENRE nga si Abdulraof Macacua miingon, “samtang ang among prayoridad karon mao ang pagtabang sa nasyonal nga gobyerno aron mapaubos ang kaso sa COVID-19 nga virus ug mapugngan ang pagkaylap niini, dili nato dapat ibalewala ang atong katungdanan sa pagpreserbar sa atong kinaiyahan.”
“Kini nga krisis nagpahinumdom sa ato nga ang polusyon ug uban pang mga peligro sa katilingban mahimong malikayan kung naay politikanhong pagtinabangay (political will),” dugang niya.
Niadtong mi-aging mga semana, miingon si Macacua nga sa iyang pagpangalagad daghan sila ug gibuhat nga inisyatibo sa pag-preserbar sa kinaiyahan sa rehiyon, bisan pa man nga nag-atubang ang katawhan sa katalagman sa COVID-19.
“Ang MENRE nakahimo na ug daghang mga inisyatibo sama sa ‘Kayod Ka Bangsamoro’, diin tumong niini ang paghatag ug mga ‘survival gardens’ nga dugay na gisugdan apan karon lang nga krisis napausbaw tungod sa kahimtang nga atong nasinati karon,” ingon ni Macacua.
“Ang among Palaw Rangers (Forest Rangers) nakigtambayayong usab sa lainlaing mga Local Government Units aron masiguro nga ang among ‘environmental sanitation activities’ ma plastar, labina kay daghang mga programa sa panghatag ug relief goods,” dugang niya.
Gi-awhag sa Ministro ang tanan nga mga opisina sa BARMM, mga organisasyon sa katilingbang, ug ang kinatibuk-ang Bangsamoro nga magpadayon sa pag-apil sa mga programa alang sa pagsalbar sa kinaiyahan.
Dugang pa, miingon siya nga ang publiko kinahanglan nga “kanunay magpraktis sa gagmay nga mga inisyatibo o naandan sama sa husto nga pag-gamit sa plastik sa opisina ug sa balay; husto nga paggamit sa enerhiya; ug bisan ang gagmay nga mga butang sama sa paggamit ug mga ecobags (ecological bags) kung moadto sa mga merkado.” (BGE/PIA ICIC)
source https://pia.gov.ph/news/articles/1039900