Cebuano News: Calibrated nga pagpauli sa mga stranded Caraganons nauyonan
DAKBAYAN SA BUTUAN, Hunyo 26 — Nauyonan sa mga lideres sa Caraga atol sa 8th Regional Task Force for COVID-19 One Caraga Shield [RTF-COCS] teleconference, niadtong Hunyo 23, nga himoong calibrated ang pagpasulod sa mga Locally Stranded Individuals [LSI] ug Returning Overseas Filipinos [ROF] pagkahuman sa moratorium sa ilang mga biyahe pauli nga gisugdan niadtong Hunyo 22 hangtud sa Hulyo 4.
Imbes nga sama ra sa walay control ang biyahe, himoon nga kausa o kaduha lang kini matag semana/buwan ug limitahan ang gidaghan niini aron mapahiluna gyod sa mga moatiman kanila pag-abot nila sa Caraga, sumala pa sa nauyonan sa diskusyon nga gipangunahan ni Gov. Dale B. Corvera sa Agusan del Norte, ang Chairperson sa RTF-COCS ug sa Caraga Regional Development Council. Hinuon, hulaton pa sa RTF-COCS ang mahimong desisyon sa nasudnong kadagkuan kalabot niining maong resolusyon.
Mahinumdoman nga gihangyo sa mga lideres sa Caraga sa milabay’ng semana nga mag-isyu usa og moratorium ang National Inter-agency Task Force on Emerging Infectious Disease (IATF-EID) sa mga biyahe sa LSIs ug ROF pauli sa Caraga aron mapahiluna nilag maayo ang pagplastar sa mangabot ug malikayan ang nahitabo sa pipila ka mga nanguli nga nahimong positibo sa COVID-19. Gitugotan kini sa IATF-EID ug kasamtangang giundang karon ang maong mga biyahe.
Sa panaghisgut sa maong tigum gitaho ni Regional Director Lilibeth Famacion sa Department of Interior and Local Government [DILG] nga systematic ug organisado ang pag-koordinar sa ilang buhatan. Apan, adunay pipila ka mga indibidwal nga gitawag nga “undocumented LSI o ROF” o “strikers” nga makalusot tungod kay magkuha sila og kaugalingong ticket ug kalit ra moabot sa rehiyon without prior notice nga maoy posibleng hinungdan sa taas nga ihap sa positibo sa COVID-19.
Hinuon, dugang ni Famacion nga ang maong mga strikers naay mga rekisitos sama sa medical certificate ug travel authority lakip na ang pag-agi og rapid testing.
Nagkahiusa usab ang mga lideres sa lima ka probinsya ug usa ka syudad (Butuan) sa Caraga nga mag-contribute og Php100,000 matag usa aron ma-sustiner ang panginahanglanon sa mga LSIs ug ROFs, ingon man sa mga frontline personnel nga i-deploy sa seaports, airports ug drop-off areas sama sa pagkaon ug transportasyon ug aron usab masuportahan ang mga frontline workers ilabina sa massive arrival sa mga LSI ug ROFs sa umaabot nga mga adlaw. (Karen Kie V. Decamotan, LGU Agusan del Norte/PIA Agusan del Norte)
source https://pia.gov.ph/news/articles/1045800