Cebuano News: CHO nanawagan sa mga residente alang sa kooperasyon ug pagkamatinud-anon batok COVID-19
ILIGAN CITY, Abril 18 (PIA)—Gi-awhag sa City Health Office (CHO) ang mga residente nga sundon ang mga giya ug pagbutyag sa tinuod nga ‘medical ug travel history’ kon mga medikal ug pagbyahe nga mga rekord aron sa ingon ani nga paagi mapugngan ang pagkaylap sa Coronavirus Disease 2019 (COVID-19).
Si Dr. Cherlina Cañaveral sa CHO nagsaysay kung unsa ka-importante ang kooperasyon sa komunidad pinaagi sa pag-obserbar sa social distancing, pagpabilin sa balay, ug regular nga paghugas sa kamot.
“Importante ang kooperasyon sa community members kay dili magsilbi ang atong LGU ug mga health workers kung dili sila mag-cooperate,” ingon ni Cañaveral.
Gidasig usab niya kadtong mga residente nga nakasinati sa mga sintomas o mga timailhan sa impeksyon sa respiratory nga modangop dayon sa ilang health center.
“Dili kita mamakak ug dili angay mahadlok. Kinahanglan gyod isulti ang mga gibati tungod kay tumong sa mga health workers nga matabangan ug mauli-an ang mga naay ‘signs or symptoms sa respiratory infection,” dugang ni Cañaveral.
Miingon usab si Cañaveral nga ang pagbutyag sa kamatuoran bahin sa mga isyu sa kahimsog mahinungdanon aron samtang sayo pa, mahibal-an na ug ma-diagnos na direstso.
Gipadayon sa kagamhanan sa syudad sa Iligan ang pagpatuman sa enhanced community quarantine hangtud Abril 30, 2020. (BGE/ PIA ICIC)
source https://pia.gov.ph/news/articles/1039384