Cebuano News: DOT mingbahad sa mga middlemen nga mangomisyon sa COVID-19 victims
TAGBILARAN CITY, Bohol, April 17 (PIA) — Mibahad ang Department of Tourism (DOT) ngadto sa mga tawo ug mga grupo nga nakigsabut sa mga accommodation establishments nga bukas alang sa mingkwarantina sa coronavirus disease (COVID-19) nga undangon na ang pagsakay sa panahon aron maninapi.
Dinhi, bahad ni DOT Secretary Bernadette Romulo Puyat ngadto sa mga hotels ug mga middlemen nga kang kinsa nga gidawat nga commission maoy kina-ingnan nga momahal ang presyo sa mga kwarto. Kadtong masakpan, mahimo sila’ng multahan ug gukdon gamit ang kinatibuk-an nga pwersa sa mga balaod nga mahimong ikapil-pil sa mga manggisisupakon.
Kahunumduman nga pinaagi sa Administrative Orders No 2020-001 A ug B, ang DOT minghan-ay sa mga palisiya ug sumbanan sa pagpadagan sa mga hotels ug uban pang accommodation establishments ilabi na sa panahon sa Enhanced Community Quarantine (ECQ).
Ang AO, mahimo nga minglugwa human ang DOT nakadawat sa mga taho gikan sa Hotel Sales and Marketing Association nga may mga third party individuals ug grupo ang mingsuway na og pakigsabut sa mga accommodation establishments sa komisyon kon sila maoy makahimo nga makakompleto ang sa deal alang sa mga gipapauli nga OFWs, mga turista nga stranded ug mga health front liners nga dili na papauli-on sa ilang mga amo aron mamenosan ang pagtakod ug dali ra silang matawag kon gikinahanglan.
Mismo si Secretary Bernadette Romulo-Puyat ang mikompirmar sa gi-alegar nga pagmahal sa uban nga kwarto sa mga hotels isip usa ka dagway sa opportunistic pricing aron lamang makakuhag komisyon ang mga mingsakay sa panahon.
Matud ni Puyat, ang mga hotels, resorts, apartment hotels, tourist inns, motels, pension houses, ug mga pribadong balay nga gihimong homestay, ecolodges, serviced apartments, condotels, ug bed and breakfast facilities nga nagpadayun pa sa pagpadagan sa ilang negosyo, kinahanglang mosubay sa AO ug aron mapatuman ang labing ubos nga possible rates.
Bisan pa sa ECQ nga nagpasira sa mga dili-gikinahanglang mga accommodation facilities , kadtong mga establisemento nga nag-alagad sa foreign guests nga una na nga nagpa book sa wala pa ang Marso 17, o kadtong nagpaduol na sa mga tugpahan aron makalarga sa bisan unsang oras nga mahimo na nga mobiya, kadtong mga guests nga dugay nga mopuyo ug kadtong mga empleyado sa mga duol nga establisemento nga dili na makauli ug kadtong OFWs nga gipapauli apan gikwarantina, padayon pang silbihan niining mga pasilidad.
Matud sa DOT, ang Section 12 sa AO nagmandu nga kadtong mga nahisgutang accommodation facilities hugot nga giaghat mga magtanyag sa lowest possible rates ilabi na sa mga gipapauli nga OFWs tungod sa COVID ug empleyado sa mga establisemento nga dili pa papaulion una.
Tungod usab sa ECQ, daghang establisemento nga nagpugong na sa ilang empleyado sa pagpauli na sa mga balay kay mas modako ang tsansa nga makapatakudtakod sa kagaw, ug mao midesidir na lang nga adto na papuy-on sa mga duol nga accommodation aron usab sayun na silang tawgon kon gikinahanglan.
Ug kay kining mga tawhana gastohan man sa kompanya o sa Overseas Workers Welfare Authority (OWWA), kini maoy nakita sa mga opportunistic individuals nga panahon nga masapi-an ang mga biktima sa COVID disruptions.
“Ang Department of Tourism hugot nga mingpadayag sa [atong] kaligutgot niining bansay, samtang ato nga gi-aghat ang mga accommodation establishments nga magtanyag gayud sa ilang best rates possible,” matud ni Romulo-Puyat. (rahc/PIA-7/Bohol)
source https://pia.gov.ph/news/articles/1039208