Cebuano News: DTI FABLABs nanguna sa local nga paghimo’g PPEs
TAGBILARAN CITY, Bohol, April 28 (PIA) — Naghugpong ang mga Fabrication laboratories (FABLAB) sa kinatibuk-an nga Central Visayas alang sa usa ka hiniusang tumong: tabangan ang pagbuntog sa coronavirus disease (COVID) pinaagi sa paghimog mga panalipod sa katawhan ilabi na niadtong nanguna sa pagpakigbugno sa kagaw.
Ang FABLAB usa ka proyekto nga gipundohan sa Department of trade and Industry, Department of Science and Technology ug sa pagpakig-abin sa mga nasud sa Japan, Amerika ug mga kahugpungan gipabarug aron kahatagan ang katawhan sa kahigayonan sa paghimong tinuod sa ilang mga damgo nga imbensyon.
Dinhi sa Bohol ang Bohol Island State University (BISU) maoy hugpanan sa FABLAB, samtang may tagsa ka FABLAB ang Siquijor ug Negros Oriental samtang may lima ka FABLABS ang Sugbo.
Matud sa DTI, mismo ang ilang Regional Operations group ug ang DTI -7 mismo ang mipalihok sa ilang mga 8 ka FABLAB hubs dinhi sa Central Visayas aron maghimo sa mga personal protective equipment (PPE) aron may magamit ang mga frontliners sa bugno sa COVID-19.
Hangtud niadtong Abril 17, ang FABLAB BISU Bohol pananglitan, nakahimo na og 3,606 ka face shields, o plastic acetate nga tabon sa nawong aron dili kini malagsikan sa laway samtang nagtrabaho ang frontliner batok sa COVID.
Gawas pa sa hangtud niadtong Abril 16, ang kinatibuk-an nga fablab network sa Central Visayas nakahimo na sa 24, 358 ka face shields, 4,093 ka face masks nga noog, 359 ka medical gowns ug 20 ka aerosol boxes, tanan alang sa mga medical ug security frontliners sa kinatibuk-ang Central Visayas.
Kahinumduman nga nagkalisud ang nasud sa pagpahitsas sa mga medical frontliners sa bugno batok sa COVID sanglit paspas nga mahurot ang gamit kay, gikataho nga sa usa ka pasyente, kon katulo siya duolon sa doctor, katulo usab angay ang doctor nga pagpuli og PPE.
Sa laing nga bahin, sa panahon nga maglisud na gyud ug ginhawa ang pasyente nga giatake sa kagaw ang ginhawaan, mapugos ang mga medical professionals sa paglaslas sa bubunlan niini aron butangan og tubo pag-abag sa pag-ginhawa.
Kini nga intubation procedure, delikado kay segurado gayud nga malagsikan sa laway ang doctor, hinungdan nga may gikinahanglang himan, ang aerosol boxes, nga karon gihimo na usab sa mga FABLABS.
Naghimo na usab ang FABLAB BISU Bohol sa swabbing booths nga ipahimutang sa 10 ka province-run nga mga hospital nga giingon nga himoong rapid antibody testing centers sa COVID .
Sa kinatibuk-ang nasud, 46,055 na ka face shields, 23,104 ka noog nga face masks, 1,201 medical gowns, ug 217 ka aerosol boxes nag nahimo sa FABLAB networks hangtud Abril 16, 2020.
Subay usab niini, miaghat ang DTI-Region 7 pinaagi ni Assistant Regional Director Maria Elena Arbon ngadto sa publiko sa pagtabang sa mga fablab sa pagpalit sa mga materyales nga gikinahanglan alang sa ilang mga PPEs.
Matud ni ARD Arbon, mahimo nga mobasa ug motanda sa https://tinyurl.com/FablabPHResponse aron kon makahukom, makasumpay nagdto sa duol nga FABLAB aron makahatag sa hinabang o makahatag sa tambag alang sa mga proyekto batoik sa COVID. (rahc/PIA-7/Bohol)
source https://pia.gov.ph/news/articles/1040270