Cebuano News: Istriktong implementasyon sa ‘curfew’ ug pag ‘ban’ sa mga ilimnon gihingusgan sa Iligan City
ILIGAN CITY, Abril 1 (PIA) – Ang lungsod sa Iligan nag-implementar sa bag-ong oras sa ‘curfew’ kini aron mapalig-on ang pagpatuman sa Enhanced Community Quarantine (ECQ) tungod sa padayon nga pagkaylap sa coronavirus disease (COVID-19).
Gipirmahan ni City Mayor Celso Regencia ang Executive Order No. 34 nga nagpahamtang sa bag-ong oras sa ‘curfew’ sugod alas 6:00 sa gabi-i hangtod alas 6:00 sa buntag.
Sugod sa Marso 31, gidili na pud ang pagbaligya ug pag-inom sa ilimnong makahubog.
Ang bag-ong ‘curfew’ naglangkob sa mga hamtong ug menor de edad—gawas sa mga miyembro sa Philippine National Police, Armed Forces of the Philippines, Fire Department, Barangay Officials, Barangay Peace Action Team, medical personnel, ug duly-accredited front liners ug mga first responders.
Miingon si Regencia nga ang syudad nagpatuman na kani-adto ug usa ka ‘nightly curfew’ sugod alas 9:00 sa gabi-i hangtod alas 5:00 sa hapon, pero kini napamatud-an nga kulang.
Gimando pud ni Regencia nga sa pagpadayon sa panahon nga naa ang nasud sa ‘health emergency’, ang tanan nga mga establisyemento wala tugoti sa pagbaligya, pagserbisyo, paghatag ug paghatod sa tanan nga mga klase sa ilimnong makahubog.
Ang pag-inom sa bino ug uban pang ilimnong makahubog hugot usab nga gidili sa tanan nga mga pampubliko’ng lugar.
Ang lungsod sa Iligan dunay duha nga nakumpirmang nagpositibo sa COVID-19 kutob gahapong adlawa Marso 31. Ang una nga kaso gikan sa Lanao del Sur nga naa nahimutang karon sa ‘facility quarantine’. Ang bag-ong kaso usa ka 67 anyos nga babaye nga gi-admit niadtong Marso 29 tungod sa pneumonia. Ang pasyente naay mga gibati nga DM Type 2, Hypertension Stage 2, ug Polycythemia Vera. Nakita usab sa iyang rekord nga nakabiyahe ug nakabisita siya sa Makati City sa Manila.
Base sa rekord gikan sa Iligan City Health Emergency Management Surveillance Unit nga kutob Marso 31, 35 na lang ang nahabilin nga Persons Under Monitoring kon PUM; samtang 11 pa ang gipaubos sa Persons Under Investigation kon PUI. Sa kasamtangan, wala’y mga bag-ong kaso sa PUM ug PUI.
Samtang, gipahinumduman ang mga residente sa Iligan nga tawagan ang mga hotlines sa gobyerno sa lungsod kung dunay ilang gidudahan nga bisan kinsa nga nagpakita ug timailhan ug sintomas sa COVID-19, sama sa sakit sa tutunlan, uga nga ubo, hilanat, pagsuka, ug kalisud sa pagginhawa.
Ang City Health Office mahimong makontak sa mga musonod nga numero 0950-894-2444 (Smart) o 0955-971-1888 (TM) samtang ang mga hotline sa City Disaster Risk Reduction Management Office mao ang 811, 812, o 0997-726-2692. (BGE/PIA-ICIC)
source https://pia.gov.ph/news/articles/1037829