Cebuano News: Lanao Norte guv nag-awhag sa publiko nga ‘maminaw sa awtoridad’ ning panahon sa COVID-19 krisis
ILIGAN CITY, Marso 31 (PIA)—Si Governor Imelda Q. Dimaporo sa Lanao del Norte mi-awhag sa tanan nga residente sa maong probinsya nga magsunod kanunay sa mga giya sa awtoridad aron sa paglikay sa sakit nga Coronavirus Disease 2019 (COVID-19).
“Ang Department of Health kon DOH dako kaayo ug tabang diha sa pagpatuman sa mga patakaran ug pagpahibalo sa katawhan aron maprotektahan ang ilang kaugalingon. Ang pagsunod sa sugyot sa gobyerno, ilabi na sa DOH maayo kaayo nga pamaagi,” ingon ni Dimaporo.
Ang Gobernador nag-ingon nga ang pagpabilin sa balay, pag-obserbar sa ‘social distancing’, ug ang insaktong paghugas sa kamot kinahanglan sundon aron malikayan ang sakit nga COVID-19.
“Atong tabangan ang mga frontliners pinaagi sa pagtuman sa mga tambag ug pahimangno sa DOH,” maoy panawagan ni Gov. Dimaporo human ma-kumpirma ang pinaka-una nga kaso sa COVID sa probinsya.
Si Gov. Dimaporo mibutyag nga ang usa ka 68 anyos nga lalaki nga nag luya kaniadtong Marso 25. Ilang gi-lain sa usa ka kwarto sa Lanao Provincial Hospital sa Kapatagan. Gihatud dayon kini sa CDO- Northern Mindanao Medical Center pagka Marso 29 ug didto nadiskubrehan nga kini positibo sa sakit nga COVID-19.
Sa gipahigayon nga pagsubay sa mga gihimo niini nga pasyente, nahibal-an nga ang nasangpit nga pasyente nagtambong diay sa usa ka panagtigum sa New Matina Davao Gallera.
Tungod niini, mitambag ang probinsya nga si kinsa kadtong nanambong sa New Matina Davao Gallera kaniadtong Marso 6-13, 2020 kinhanglan nga mopa-ubos sa 14 ka adlaw nga kwarentina. Alang usab sa ilang pamilya, mga higala, kauban sa trabaho, ug mga suod nga mga kontak, kinahanglan sab sila “mag-isolate.”
Kung sila makasinati ug dili maayong paminaw sa lawas sama sa sip-on, ubo, hilanat, sakit sa tutunlan ug pagkalibanga, kinahanglan ipahibalo o modangup dayon sa ilang Barangay Health Emergency Response Team aron matagaan sila sa insaktong giya. (ZDJ/PIA ICIC)
source https://pia.gov.ph/news/articles/1037822