Cebuano news: Marawi LGU nagtukod ug ‘decontamination tent’ batok COVID-19
MARAWI CITY, Abril 6 (PIA) — Nagtukod ug mga ‘decontamination tent’ ang kagamhanang lokal sa Marawi City aron pakusgan ang mga lakang niini sa pakig-batok sa coronavirus disease 2019 (COVID-19).
Kini nga mga ‘decontamination tent’ nag-silbi nga agi-anan lang kon “walk-through” nga mga tulda nga gibutangan ug tambal nga pangpatay sa kagaw nga nagtapot sa lawas ug sanina. Dinha sa tulda mag-tunob ang mga tawo nga mosulod sa syudad. Diha kini gipangtukod sa Marawi City Hall, Emie Punud-Sagonsongan intersection, ug sa mga ‘boundaries’ sa Marantao ug Ramain, Lanao del Sur.
Kini nga tulda dako kayo ug tabang sa publiko aron dili matakdan ug aron dili makatakod sa gikahadlokan nga sakit nga COVID-19 tungod kay epektibo ang tambal nga gibutang isip ‘disinfectant’.
Sa kasamtangan, si Mayor Majul Gandamra nag-implementar ug bag-ong curfew nga magsugod sa alas 4:00 sa hapon hangtud sa 6:00 sa buntag, para sa panaghi-usa ug pagdisiplina sa katawhan.
“Kini nga problema dili masulbad sa usa lang ka tawo or grupo. Kinahanglan kitang tanan magtinabangay. Ang mga palisiya kinahanglan pagasundon tungod kay kini gibuhat para sa tanan; dili kini pagpugong sa kagawasan kon dili pagpugong sa pagkaylap sa kagaw,” matud ni Gandamra.
Ang mga ‘decontamination tent’, gidumala sa nagkalain-laing ahensya sa gobyerno sama sa City Disaster Risk Reduction Management Office, General Services Office, City Engineering Office, ug Marawi City Police Office. (Zenaida D. Jagudilla/PIA-ICIC)
source https://pia.gov.ph/news/articles/1038107