Cebuano News: Mga embahada nagbukas og mga sweeper flights sa stranded guests

Kini nga pahibalo, gikan sa desk sa Department of Tourism (DOT) dinhi sa Bohol pinaagi ni Jaypee Orcullo.

Matud niya, kadtong mga foreigners nga buot na nga mouli sa ilang tagsatagsa ka mga nasud, mahimo nga makigsabut sa ilang mga embahada, kay kon wala man sila’y ikaorganisa nga mga byahe, mahimo nga isakay sa ubang embahada nga nagpahigayon niini.

Ang DOT Bohol ug ang Bohol Tourism Office (BTO) bukas alang sa pagtabang sa mga foreigners nga nahibilin sa Bohol human ang wala damhan nga pagkawala sa mga byahe sa eroplano ug barko human sa hulga sa pagkuyanap sa coronavirus (COVID-19).

Matud pa ni DOT Bohol desk officer Orcullo, karon’g Abril 9 ug 10, ang Brazilian Embassy may gi-organiza nga special sweeper flight gikan sa Sugbo paingon sa Manila.

Subay niini, ang mga foreigners nga interesado nga makasakay sa byahe mahimo nga makigsabut sa Bohol Tourism Office ug sa DOT Bohol aron mapahigayun ang pagpahiluna sa byahe gikan sa Bohol paingon sa tugpahanan sa Sugbo.

Dugang ni Orcullo nga ang DOT ug BTO kasamtangan nga nagpahiluna sa byahe nga mahimong sa eroplano o sa barko patabok.

Sa Sabado pohon, Abril 11, sa pagpahiluna sa Swedish Embassy, lain na usab nga sweeper flight ang magagikan sa Panglao paingon sa Sugbo ug lahos na sa Manila.

Alang niini nga byahe, ang DOT Bohol mipahayag nga ang nga residente sa mga sakop nga nasud sa European Union ug sa mga Nordic States mahimong moluwan sa eroplano nga gitagana.

Hinuon, sila nga buot mosakay, kinahanglan pa una nga makig-coordinate sa ilang tagsatagsa ka embahada sanglit ang pagsabutay, tua sa lebel sa ibabaw o sa embassy level, matud sa DOT.

Sa Abril 14, ang Canadian Embassy na usab ang nag-organisa og lain nga sweeper flight gikan sa Cebu ngadto sa Manila, ug ang mga Canadians nga na stranded sa Bohol mahimo na nga mopahibaw sa ilang interes nga mosakay, nagdto sa BTO o DOT sa labing dali nga panahon.

Sa Miyerkoles, Abril 15, ang Japanese Embassy na usab ang mipahiluna sa usa ka sweeper flight, ug kadtong mga Hapon nga nahibilin pa dinhi, mahimo nga sa labing dali nga panahon, makigtali sa BTO pinaagi ni Joanne Linal sa 09062401168 o sa DOT pinaagi ni Jaypee Orcullo sa 09075489061.

Sa dili usab madugay, ang Spanish Embassy mipahibaw nga nga magpadala usab sa ilang sweeper flight, hinuon, wala pay gibuhi-an nga dugang katikaran ang embahada kabahin nini.

Kadtong uban nga mga foreign nationals kang kinsang mga nasud, wala mag-organisa sa flights, mahimo nga makigsabut sa ilang tagsatagsa ka embahada basin mapahiluna na usab nga makasakay sila sa mga flights nga magkuha sa mga turista nga na stranded sa nasud. (rahc/PIA-7/Bohol)