Cebuano News: P753-M nahatag sa DBP alang sa PUV Modernization
TAGBILARAN CITY, Bohol, May 1 (PIA) — Napagawas na sa Development Bank of the Philippines (DBP) ang kapin sa P753-M sa dagway sa pahuwam ilawom sa usa ka pinahaum nga programa sa pagpundo alang mga kompanya sa transport ug mga kooperatiba aron sila makapalit og moderno ug bag-0 nga jeepney units nga gaan sa kalikopan, taho sa usa ka opisyal sa state-owned nga bangko.
Kinatibuk-an na nga 53 ka mga kooperatiba sa panakyanan ang mihuwam sa suporta sa DBP ubos sa Program Assistance to Support Alternative Driving Approaches (DBP PASADA), segun pa ni DBP President ug Chief Executive Officer Emmanuel G. Herbosa.
Ang DBP PASADA una na nga namugna niadto pang 2017 agi og suporta sa Public Utility Vehicle Modernization Program (PUVMP) sa nasudnong kagamhanan.
“Ang tabang pinansyal sa DBP nagpadayag lamang sa atong lig-on ug hugot nga panaad nga abag alang sa PUV modernization program sa kagamhanan,” matud ni Herbosa.
“Nahiusa kita sa ato ug sa publiko nga tumong nga moluwan sa luwas, kasaligan ug maayo nga pagpadagan nga pangpublikong panakyanan,” dugang niya.
Kahinumduman nga ang DBP ika walo sa labing daku nga bangko sa nasud kon ang kabtangan niini ang hisgutan.
Ang bangko usab naghatag sa pautang agi og suporta sa mga sector sa ekonomiya sama sa imprastraktura ug logistics; micro, small ug medium nga pamuhunan; kalikopan; serbisyong pangkatilingban ug ang kinatibuk-ang pag-ugmad sa katilingban.
Niadtong hinapos sa 2019, ang kinatibuk-an nga pundo pahuwaman sa DBP naa na sa P413.9-bilyones ug ang P14.89-biyones niini, aalang lamang sa sector sa panakyanan.
Ang DBP PASADA Financing Program usa na espesyal nga loan financing facility alang sa mga korporasyon ug kooperatiba nga rehistrado sa Office of Transportation Cooperatives, nga moapil sa PUVMP ug mahimong modawat sa mga prangkisa sa Land Transportation Franchising and Regulatory Board (LTFRB) ubos sa Omnibus Franchising Guidelines alang sa PUVMP.
Gidason ni Herbosa ang panginahanglan nga pasayonon ang suporta alang sa sector sa panakyanan aron mapaugmad ang panakyanan nga pangpubliko sa nasud ug kubsan ang epekto sa ekonomiya ilabi na sa nagbadayong nga mga kwarantina.
Dugang niya nga ang maayo nga pagkadumala ug kasaligan nga sistema sa pangpublikong panakyanan nagpabiling labing maayong pang-agni sa dugang pang mga dagkong maumuhunan aron makatabang sa pagbarug sa nasud gikan sa COVID pandemic.
“Ang mga State financing institutions sama sa DBP, magpabilin gyud nga motabang sa sector sa pangpublikong panakyanan ug sa mga kooperatiba ug sa ilang mga tagdumala samtang sila usab nakigsungag sa mga hagit sa unsay bag-ong normal ilabi na nga nagpadayon pang nagpanakod ang sakit nga gikahadlokan na sa tanan,” saad ni Herbosa. (rahc/PIA-7/Bohol)
source https://pia.gov.ph/news/articles/1040593