Cebuano News: Padayon ang pista apan kini yano lamang
CORTES, Bohol, April 14 (PIA) — Padayon ang hudyaka ug saulog sa pista sa buwan sa Mayo.
Kini segun pa sa pastoral letter nga gipagawas niadtong Abril 12, 2020 sa duha ka Obispo sa Bohol: Si Bishop Alberto Uy sa Diyosesis sa Tagbilaran ug si Bishop Daniel Patrick Parcon sa Diyosesis sa Talibon.
Hinuon, sukwahi sa sagad nga kasaulogan sa kapistahan sa mga Basic Ecclesial Community clusters, kapilya ug simbahan sa mga kalungsuran, ang pista niining panahon sa kahigwaos, usa ka lahi ug yano nga kasaulogan sa pagpasalamat sa labaw nga makakagahum inabagan sa mga debosyon ug patron, alang sa mga grasya nga nadawat ilabi na sa pag-iway sa Bohol sa gikahadlokan nga sakit sa coronavirus.
Ang li-nain nga pista, aduna pa gihapoy mga novena ug misa sulod sa mga simbahan ug kapilya, apan kini dili patambongan sa mga debotos, segun pa sa duha ka obispo.
Bisan hinuon kon bugtong ang pari lamang, kauban sa iyang luyo-liyo nga vicar ug mga sacristan ang motambong niini, maningkamot ang pari nga mapasibya kining maong mga kalihukan aron makasubay ang tua sa mga panimalay samtang mogamit sa mga trompa ang simbahan aron madunggan sa tanan ang kalihukan sa sulod.
Aduna pa gihapo’y prosesyon, aron ikalibod ang imahen sa patron, apan kini ikarga na sa sakyanan, dili man pakuyogan og lain, apan mosubay sa labing daghan nga agi-anan aron masuroy ang kabalayan, gawas sa kasagarang libudanan. Kadtong mga balay nga maagi-an, magdagkot og kandila ug mag-ampo samtang molabay ang prosesyon.
Niini, ang tanang parokyano giaghat nga paduyog sa kasadya ilabi na sa mga misa, samtang nagtan-aw o namati sa radio o telebisyon o sa internet sa mga gisibya nga kalihukan sa pista.
Mahimo gihapon nga maghikay, apan, matud pa sa duha ka magbalantay sa pagtuo, niining panahon sa kalisud, dili haum nga magburaska sa galastohan, samtang daghan ang walay gikaon.
Dili usab maayo nga mangimbitar kay aron mas sayon matuman ang social distancing. Hinuon, giaghat sa duha ang mga kabalayan nga adunahan, sa pagpa-ambit sa ilang pagkaon nga giandam ngadto sa kabus ug gutom nga mga silingan.
“Unta maagni kita sa mga pulong ni Hesus nga nag-ingon, kon maghimo og bankete, ayaw nag imbitaha pa ang imong mga higala, igsoon, kaparyentehan ug ang mga adunahan, hinuon, kadto silang kabus, bakul, lulid, mga buta, mabulahan kamo, kay ang Dios magabalos kaninyo,” panapos sa pastoral letter nga gipangbasa sa mga parokya niadtong gabii sa behilya sa sugat sa pagkabanhaw. (rahc/PIA-7/Bohol)
source https://pia.gov.ph/news/articles/1038874