Cebuano news: Pagsul-ob ug ‘face mask’ gi-mando sa Malaybalay City
MALAYBALAY CITY, Bukidnon, Abril 2 (PIA) — Gipirmahan ni Mayor Florencio T. Flores ang bag-ong Executive Order (EO) No. 84 nga nagmando sa estriktong pag implementar sa pagpasul-ob ug ‘face mask’ sa bisan asa nga pampublikong lugar sa syudad sa Malaybalay.
Kini dali nga gipatuman human gibutyag sa Department of Health (DOH) nga naa nay kumpirmadong nag positibo nga kaso sa Coronavirus Disease 2019 (COVID-19) sa rehiyon 10.
Gimando-an ang tanang katawhan sa pagsul-ob sa ‘face mask’ kung mo adto sa pampublikong lugar, lakip ang mga publiko nga opisina ug pribado’ng mga establisyemento, pribado ug pampublikong mga sakyanan.
Matud pa ni mayor Flores nga kini dinali-an nga pag implementar ug angayang ipatuman ang dugang ug hingpit nga mga lakang aron mapalig-on pa ang mga pagpugong sa maong virus sa syudad sa Malaybalay.
Gitahasan usab sa Mayor ang mga kawani nga nagdumala sa lungsod ug mga opisyales sa barangay, mga lider sa purok, Barangay Public Safety Officer (BPSO), ug Traffic Management Center sa pag kontrol sa checkpoints aron hugot nga ipatuman ang bala-od ug mga lakang aron mapugngan ang pagsulod sa COVID-19 diha sa ilang tagsa-tagsa ka nila ka barangay. (Bernadith G. Epan/PIA Bukidnon)
source https://pia.gov.ph/news/articles/1037658