Cebuano News: PCIC extension office gibuksan na sa Siquijor
SIQUIJOR, Feb. 24 (PIA) — Gibuksan na sa buhatan sa Philippine Crop Insurance(PCIC) ang ilanng Provincial Extension Office dinhi sa Isla sa Siquijor alang sa pag-alagad sa mga mag-uuma ug mangingisda aron matawhay ang ilang panginabuhi.
Atol sa opening ug blessing sa bag-ong buhatan sa PCIC Extension Office niadtong Febrero 19, gipahayag ni Antonio S. Uy, Senior Vice-President ang mga gilatad nga proyekto alang sa mga mag-uuma ug mangingisda. Kini nagalangkob sa free-insurance, livestock development, fishery paraphernalia ug uban pa.
Sumala ni Uy, ang ilang buhatan nakadawat ug 3.5 bilyones ka pesos gikan sa Department of Budget and Management (DBM) alang sa free-insurance sa 13 bilyon ka mga mag-uuma sa tibook nasud.
Matod ni Uy, 60 porsyento lamang ang tinuod nga mag-uuma ug ang 40 porsyento naglangkob sa mga magtitikad.
Gisaysay usab niya nga ang agri-agra funds makaabag sa atong mga mag-uuma ug mangingisda.
Sa bulan sa Enero, ang PCIC nakadawat ug P1.3 bilyon ka pesos sikan sa Central Bank alang sa insurance ug proteksyon sa mga mag-uuma ug sa mga proyekto sa Department of Agriculture.
Ning tuig 2020, mikabat na sa duol P5 bilyon ka pesos ang nagahin alang sa free-insurance sa mga mag-uuma ug mangingisda tibuok nasud, sumala pa niya.
Niadtong Disyembre 2019 ang PCIC nakabayad ug P4 bilyon alang sa insurance sa mga mag-uuma ug mangingisda sa tibuok Pilipinas, 4.5 milyon niini ngadto sa insurance sa 950 ka mag-uuma sa Siquijor.
Ang atong mga mangingisda gikinahanglan nga hatagan usab ug ayuda ilabina nga apektado sila sa mga katalagman, ug daotang panahon. Kon madaot ang ilang bangka, mahatagan dayon sila sa ayuda kun rehistrado kini, pasupot ni Uy.
Atol usab sa pagbukas, mao ang paghatag sa “Indemnity checks” ngadto sa upat ka mag-uuma nga sila: Orlando Andog sa Catulayan, San Juan; Reinario Omalza sa Tinago, Siquijor; Alma Balucan sa Cangmalalag, ug Silvestre Patarlas sa Canlasog, ang duha nahisakop sa Larena, Siquijor.
Ang buhatan sa PCIC anaa sa 2nd Floor, Siquijor Business Center, Corner Mabini and Sta. Fe Streets, Siquijor, Siquijor. (rac/PIA7-Siquijor/EFCalibo/SAID)
source https://pia.gov.ph/news/articles/1035343