Cebuano News: PRC: May lugway ang PIC renewal nga naligsan sa ECQ

TAGBILARAN CITY, Bohol, April 22 (PIA) — Propesyonal ka  ba ug  ang imong gihuptan nga lisensya mo-expire na sulod sa panahon nga dili ka kalakaw kay naa ka pa sa kwarantina?

Ayaw na kaguol, sanglit, matud sa Professional Regulations Commission (PRC), ang pagka valido sa imong Professional Identification Card (PIC) ug kadtong gihuptan sa tanang propesyonal nga moexpire na unta sa panahon nga nagsige pa gihapon ang kwarantina, lugwayan pa hangtud nga ikalibkas na kining panahon sa kwarantina.

Subay ug nunot sa Presidential Proclamation No. 922 pinitsahan niadtong Marso 8, 2020 kanus-a gideklara ni Presidente Rodrigo Duterte ang State of Public Health Emergency sa tibuok nasud, nga nagpasugod usab sa Enhanced Community Quarantine sa Luzon ug sa Community Quarantines sa pipila ka lalawigan sa Visayas ug Mindanao, nakahukom ang PRC sa paglugway sa validity sa PRC IDs.

Hinuon, dugang sa PRC, sa mismo nga higayon nga ikalibkas na ang ECQ ug CQ sa mga lugar, kadtong nanag-iya sa PRC ID nga ming-expire na, kinahanglang makaduso sa ilang applications online alang sa PIC sulod sa 30 ka adlaw kay dinhi, wala pay silot nga ipatong sa proseso.

Dugang sa PRC, kadtong mga propesyonal nga aduna nay kompirmado nga appointments alang sa renewal apan naligsan sa ECQ, atubangon gihapon sila sa PRC inig balik na sa normal nga operations kon ikalibkas na ang panahon sa kwarantina.

Aghat sa PRC, tanda-tandaa lamang ang PRC website ug social media accounts aron masundan usab ang mga pahibalo nga ipagawas sa komisyon. (rahc/PIA-7/Bohol)

source https://pia.gov.ph/news/articles/1039758