Cebuano News: Provincial Employees Village gi-convert nga pasilidad alang sa COVID-19 nga mga pasyente

MARAWI CITY, Abril 18 (PIA)—Ang proyekto nga mga kabalayan sa Provincial Local Government Unit sa Lanao del Sur (PLGU LDS) nga gitagana para unta sa mga empleyado sa probinsya, gi-andam karon sa provincial government kung ugaling modaghan ang matakdan sa coronavirus disease 2019 (COVID-19).

Ang 46 ka mga bag-ong hinimo nga balay sa Purok Badak sa Barangay Emie Punod, gamiton alang sa pasyente sa COVID-19 o suspetsado sa probinsya ug syudad sa Marawi City. 

Si Gov. Mamintal “Bombit” Alonto Adiong, Jr. miingon ug nagpahibalo sa katawhan pinaagi sa iyang ‘facebook video’ nga kining mga balay para sa mga emplyado sa probinsya mag silbing temporaryong Community Quarantine Facility (CQF).

Ang gihisgutan nga mga balay naa nay tubig, kuryente, kinural na ang palibot niini, ug naa nay gi-instalar nga sanitation tent.

Kining tanan gisuportahan sa PLGU-LDS, Integrated Provincial Health Office ug Makati Medical Foundation pinaagi sa Marawi City Health Office.

Ang Pepsi Cola Company sa Philippine Disaster Resilience Foundation naghatag pud ug mga tangke para sudlanan sa tubig.

Sa kasamtangan, ang gobyerno sa Marawi City naghatag ug suporta sa mga katawhan pinaagi sa medical ug mga ayuda nga kagamitan para sa ilang proteksyon. Nagpasalig usab ang gobyerno sa syudad nga mahatagan ug dugang trabahante sama sa mga nurse ug doctor nga maoy mangunay sa mga pasilidad.

Ang Integrated Provincial Health Office ug Amai Pakpak Medical Center ang gitahasan sa pagdumala sa maong pasilidad ug kini naa nay mando gikan sa Provincial Local Government Unit sa Lanao del Sur. (ZDJagudilla / PIA ICIC)

source https://pia.gov.ph/news/articles/1039385