Cebuano News: PUV drivers sa Iligan makadawat ug hinabang gikan sa gobyerno

ILIGAN CITY, Abril 11 (PIA)—Ang mga pampublikong sakyanan nga naapektuhan sa ‘enhanced community quarantine’ kon gipalambo nga kwarentina sa komunidad tungod sa hulga sa sakit nga coronavirus 2019 (Covid-19) makadawat usab ug suporta’ng pinansyal gikan sa gobyerno pinaagi sa ‘social amelioration package’.

Si Director Aminoden D. Guro sa Land Transportation Franchising and Regulatory Board (LTFRB) sa Rehiyon 10 nag-ingon nga ang mga narehistro nga drayber sa mga pampubliko nga sakyanan sa dyip, taksi, van, ug mga bus nga naka kumpleto sa Public Utility Drivers Academy Program sa LTFRB angayan nga makadawat sa hinabang nga salapi.

“Ang lista nga among gisumite sa Department of Social Welfare and Development (DSWD) gi-base sa mga ngalan sa mga nakahuman na sa Driver’s Academy seminar.

Kadtong wala pa nakaapil sa seminar mahimong mobisita sa opisina sa LTFRB sa Iligan aron isumite ang ilang mga ngalan ug mga requirements,” dugang niya.

Gipasabot ni Guro nga ang listahang gisumite sa DSWD, para kini sa cross-match nga pagahimuon aron malikayan ang pagdoble sa mga benepisyaryo.

Ang tabang sa mga drayber kabahin sa social amelioration package nga kamanduan ubos sa Republic Act 11469 o ang Bayanihan to Heal as One Act, tungod sa epekto sa enhance quarantine sa komunidad.

Matud pa ni Guro nga ang mga ‘driver-beneficiaries’ sa programa makadawat ug pinansiyal nga hinabang nga nagkantidad ug P6,000 sa bulan sa Abril ug Mayo.

Aron maangkon ang cash aid, ang mga benepisyaryo kinahanglan magpresentar sa ilang original driver’s license’ kon orihinal nga lisensya sa pagmaneho ug usa ka kopya sa lisensya nga naay duha ka pirma sa labing duol nga barnch sa Landbank sa ilang lugar.

Kung nakumpiska ang lisensya, ang drayber mahimong magpresentar sa usa ka temporary operator’s permit, balido nga ID sa gobyerno, ug kopya sa ID nga gihatag sa gobyerno nga dunay duha ka pirma.

Alang sa mga magpadala ug representante, miingon si Guro nga ang representante kinahanglan magdala ug sulat nga gipirmahan sa benepisyaryo, driver’s license sa benepisyaryo, photocopy sa lisensya nga naay duha ka pirma, ug usa ka valid ID sa representante nga gi-isyu sa gobyerno. (BGE/PIA-ICIC)

source https://pia.gov.ph/news/articles/1038777