Cebuano News: Relief, nahimo’ng rescue operations sa PCG, Bantay Dagat

TAGBILARAN CITY, Bohol, April 23 (PIA) — Relief operations unta ang tumong, apan sa wa damha nga panghitabo, naatlan sa mga sakop sa Philippine Coast Guard ug sa Bantay Dagat sa syudad sa Tagbilaran ang halos nalunod na nga sakayan sa tulo ka mangingisda sa lawod sa Tagbilaran City tungod sa Booy District.

Sa mga alas 2:00 sa palis, April 21, 2020, ang mga personahe sa Coast Guard Sub Station (CGSS) Tagbilaran, kauban sa Coast Guard K-19 ug sa Tagbilaran City Bantay Dagat naghimo og pagpatrolya sa kadagatan subay sa mandu sa Community Quarantine ug No Sail Policy ug aron usab manghatag og mga hinabang sa mga gagmay nga mananagat nga naangin ang panginabuhi-an sa Enhanced Community Quarantine (ECQ) sa Bohol.

Sa ilang pagsudlay sa kadagatan, nabangawan nila ang usa  ka sakayan nga nalunod samtang ang tulo ka sakay niini, naglangoy na lamang samtang nagguyod sa sakayan paingon sa piliw.

Niini, subay usab sa mandatus sa PCG sa kaluwasan sa katawhan nga naa sa kadagatan, gi-undang usa niini ang relief operations aron sugdan dayon ang pagluwas sa sakayan ug sa mga sakay niini.

Dinhi, samtang gipaluwan sa PCG ang tulo ka mananagat nga gipaila nga sila si Samuel Remerata, 55 anyos minyo, Demetrio Doperte, 38 anyos minyo ug Eduardo Jumarito, 51 anyos ug minyo nga tanan mga taga Ubujan, Tagbilaran, giguyod usab niini ang tugob nga sakayan.

Human giguyod sa aluminum boat (AB-084) ang giapawan na sa tubig nga sakayan paingon ngadto sa mabaw nga bahin sa kadagatan tungod sa Booy, gitabangan na usab kini ug karga sa aluminum boat dihang mabaw na ug  mataak na ang tubig sa dagat.

Sa diha nga nakarga na, milawig sila gikan sa Booy paingon sa Ubujan aron mahiuli didto ang tulo ka mananagat ug  ang ilang sakayan nga nalunod.

Gitunol usab sa PCG ug sa City Bantay Dagat pinangulohan sa ilang president nga si Nelson Bongcac ang pinutos nga hinabang ari og relief ngadto sa mga gagmay nga mananagat, niadtong higayona.

Gitaho sa mga tinugyanan sa PCG nga mingkabat sa 50 ka pinutos nga hinabang gikan sa tinampohan sa mga sakop sa Coast Guard ug ni Lieutenant Junior Grade Tristan Jener Erediano, nga ilang natunol niadtong Abril 21, 2020.

Kadtong mga naatlan nga nanagat niadtong panahona, nakadawat og tag usa ka putos nga hinabang samtang gisusi usab sa mga tinugyanan kon may mga papeles ba ug markado ang mga sakayan nga giluwanan niini subay sa palisiya sa Security and Safety and Environmental Numbering sa PCG ug pagseguro nga walay sakay niini nga hingtabok gikan sa silingan nga mga lalawigan, segun pa sa Coast Guard Western Bohol pinaagi ni Anwar John Sarigumba, information Officer sa PCG. (rahc/PIA-7/Bohol)

source https://pia.gov.ph/news/articles/1039737