Cebuano News: TLDC Lanao del Sur nanghatag ug ‘facemask’ sa mga frontliners
MARAWI CITY, Abril 18 (PIA) — Ang Technology and Livelihood Development Center (TLDC) sa Lanao del Sur naghimo ug mga ‘protective suit ug face mask’ nga gipang apod-apod sa mga COVID-19 frontliners.
Niadtong Abril 14, nakahimo ug 60 ka protective suits ug 1,500 ka mga face masks nga ‘washable’ kon pwede malabhan.
Ang ubang mananahi mga Internally Displaced Persons (IDPs) gikan sa Marawi City nga gibansay sa TLDC sa pagpanahi ug mga sanina. Gihatagan pud sila sa ubang mga ahensya ug dugang makina sa panahi.
Dugang niini, ang kagamhanang probinsyal nang apod-apod ug mga relief goods alang sa mga residente sa nagka lain-laing munisipyo. Ug sa pagka-karon, duna nay 115,681 ka mga pamilya ang nakadawat niini.
Sa kasamtangan, ang quarantine facility naglangkob sa 46 ka mga bag-ong hinimo nga balay sa ‘provincial employees village’ sa Marawi City nga gi-andam alang sa mga pasyente sa COVID-19 nga dunay mild symptoms.
Si Gov. Mamintal Alonto Adiong Jr. ug Marawi City Mayor Majul Usman Gandamra, bag-o lang nagpirma sa usa ka Joint Memorandum No. 1 aron ipalapad ang enhanced community quarantine sa probinsya ug sa lungsod hangtud sa Abril 30, 2020. (ZDJ/PIA ICIC)
source https://pia.gov.ph/news/articles/1039388