Cebuano News: Walay bag-ong kumpirmado’ng mga kaso sa COVID-19 sa BARMM
MARAWI CITY, Abril 16 (PIA)—Walay bag-o nga kaso sa Coronavirus Disease 2019 (COVID-19) ang Bangsamoro Autonomous Region in Muslim Mindanao (BARMM) sukad sa miaging semana sumala sa report sa Ministry of Health (MOH).
Ang datos niadtong Abril 14, 2020 nga gikan sa MOH-BARMM nagpakita nga ang pinakaulahing natala nga kumpirmadong kaso, niadto pang Abril 6, diin usa ka 54 anyos nga lalaki gikan sa Maguindanao ang nakabutang sa rekord.
Si Dr. Saffrullah Dipatuan, Health Minister sa BARMM, nagkanayon nga sa walo ka mga nag positibo nga kaso sa rehiyon, duha (2) ang padayon nga ga-paayo.
“Karon, okay na ang ilang kahimtang ug wala na silay mga gibati nga sintomas sa ilang lawas,” ingon niya.
Matud pa ni Dipatuan nga ang usa gi-admit sa Amai Pakpak Medical Center sa Marawi, samtang ang usa gipailawom sa istrikto nga home quarantine sa Maguindanao. Ang duha ka pasyente nga nag positibo sa COVID-19 humana gi-test ug padayon ang pag-monitor nila.
Samtang, sugod sa Abril 16, magsunod na ang MOH sa bag-ong klasipikasyon sa mga pasyente sa COVID-19 gikan sa Department of Health (DOH). Ang pag-ila sa Persons Under Investigation (PUI) mahimo nang ‘Suspect’ o ‘ Probable’ para sa bag-ong klasipikasyon, ug COVID-19 Confirmed alang sa mga positibo pagkahuman sa test sa laboratoryo.
Ang ‘Suspect’ gi-classify isip ‘PUI with COVID-19’ nga dunay bisan unsang gamay, grabe, o kritikal nga mga sintomas nga wala pa na test o nagpaabot pa sa resulta.
“Sila gitawag nga ‘Suspect’ tungod kay wala pa sila ma test ingon man, kung na test sila , maghulat paman sa resulta nga mamahimong batayan nga sila positibo ba,” ingon niya.
Samtang ang ‘Probable’ nga klasipikasyon, alang sa mga PUI nga nahuman na sa mga test, apan sa mga dili sakto nga mga resulta. Kini ang mga pasyente nga nakaagi sa paspas nga test ug ge test nga walay ‘Polymerase Chain Reaction (PCR) laboratory examination’.
Hangtud karon, ang rehiyon sa Bangsamoro naay 8,809 Persons Under Monitoring (PUM) ug 7,268 niini ang naka kumpleto na sa ilang higpit nga quarantine sa balay. Samtang 264 ang naila nga mga PUI, ug naay 64 nga nahabilin nga kasamtangan pa’ng nagpailawom sa higpit nga quarantine sa balay.
“Atong makita nga sa atong pagpatuman sa enhanced community quarantine (ECQ), nagka anam-anam na ug naug ang atong kaso,” miingon si Dipatuan.
Bisan paman, sa pag-ubos sa kaso sa COVID-19, gipahimangno-an ni Dipatuan ang publiko sa posibilidad nga dunay ikaduhang bugso sa kaso sa virus kung mohunong ang community quarantine ug kung ang mga tawo dili mosunod sa mga giya sa ECQ.
Padayon nga gipahinumduman sa MOH ang mga katawhan sa BARMM nga magmabinantayon niining panahon sa pagsulay ug magpadayon sa pagpraktis sa social distancing, kanunay nga paghugas sa kamot, ug pagsunod sa mga giya gikan sa Bangsamoro Inter-Agency Task Force. (Bernadith G. Epan/PIA-ICIC)
source https://pia.gov.ph/news/articles/1039224