Hiligaynon News: Zarraga nagsugod na sa pag-implementar sang TUPAD-BKBK
SYUDAD SANG ILOILO, Abril 22 (PIA6) – – Ginsuguran na implementar sang banwa sang Zarraga, Iloilo sang Lunes, Abril 20, ang programa nga Tulong Panghanapbuhay sa Ating Disadvantaged/Displaced Workers (TUPAD)-Barangay ko, Bahay Ko (BKBK) sang Department of Labor and Employment (DOLE).
Ginpahayag ni Niezel Anen Sabrido, gindesignar nga Information Officer sang DOLE 6, nga 240 ka mga trabahador nagikan sa impormal nga sektor sang banwa ang pinakaulihi nga nalakip sa programa TUPAD-BKBK sa syudad kag probinsya sang Iloilo.
Ang mga benepisyaro nga ginabug-usan sang mga marginalized, disadvantaged kag nawad-an ukon apektado nga mga trabahador bangud sang nagapadayon nga nga enhanced community quarantine ang ginkilala sang lokal nga panguluhan nga amo ang proponent sang programa.
Suno kay Sabrido, ang mga benepisyaryo ang ginhatagan temporaryo nga trabaho pinaagi sa pag-disinfect kag pagpaninlo sang ila balay kag palibot sa sulod sang 10 ka adlaw kasunod sang pagsulundan sang ECQ.
“Sila ang maga-obra sang apat ka oras kag pagayabaran sang P395 nga amo ang minimum nga sweldo sa rehiyon,” suno kay Sabrido sa hinun-anon sa PIA Kapihan Regionwide radio program.
Magluwas sa paghatag sang bulig pinansyal, tuyo man programa nga mapalapnag ang katinlo agud labi pa matapna ang COVID 19.
Kapin sa 300 na nga mga apektado nga trabahante ang nakabenepisyo sa programa sa banwa sang Tubungan.
Sa syudad sang Iloilo, 38 ka mga benepisyaro nagikan sa Brgy. Luna, La Paz ang nahatagan man trabaho sa idalum sang programa humalin Abril 15.
Suno pa kay Sabrido nga ang aplikasyon sang Brgy. Cubay, Jaro ang ginaproseso na sa karon nga may 25 ka mga benepisyaryo.
Tubtob sang Abril 2 sini nga tuig, nakapagwa na ang DOLE 6 sang kapin P3,025,110 para sa 2,977 ka mga benepisyaryo sa 432 ka mga barangay sa Nakatungdan Bisayas pinaagi sa programa. (JSC/laf/PIA6-Iloilo/Photo courtesy of DOLE 6)
source https://pia.gov.ph/news/articles/1039626