Seguridad sa MisOr hospitals, mas gihugtan pa
MISAMIS ORIENTAL, March 29 – Dili lamang ang mga entry point sa Lalawigan sa Misamis Oriental ang gipahugtan kontra coronavirus disease (COVID-19) apan lakip na niini ang mga walo (8) ka mga Provincial Hospitals nga kanunay andam panahon sa emerhensiya.
Nunot niini, hugot nga mando ni Gob. Bambi Emano ngadto kay Dr. Jerie Calingasan ang Provincial Health officer nga magpabiling alerto ang walo ka mga balay tambalanan sa lalawigan sa posibleng mga pasyente nga makitaan og sintomas sa Covid-19.
Ang walo ka mga balay tambalanan karun sa lalawigan adunay triage nga giimplementar, Kini aron masala ug masiguro ang seguridad sa matag usa hilabi na sa mga pasyente nga anaa nasulod sa balay tambalanan.
Susama na lamang sa MOPH – Magsaysay kung diin walay maskin kinsa ang makasulod karun kung dili mo agi sa insaktong protocol.
Tanan cliente nga buot magpa check-up kinahanglan mo hulat sa usa ka designated area gawas sa hospital nga mo subay sa physical distancing.
Adunay triage nurse nga mo assess kanila ayha pa dayun epasa sa doctor. Sa dili pa mosulod sa hospital, dunay handwashing facility atubangan sa hospital sa dili pa kuhaan sa ilang vital signs ang pasyente.
Sa pagka karun ang Northern Mindanao Medical Center kon NMMC lang ang naginusarang APEX Hospital o ang gi authorize sa DOH nga mo atiman sa mga posibling kaso sa PUI ug ang nagpositibo sa maong virus diri sa Northern Mindanao.
Parehong mga pamaagi usab ang giimplementar sa MOPH-Talisayan.
Si Dr. Martina Tac-an nagkanayon nga kinahanglan gyud subayon sa matag cliente nga magpa konsulta kanila ang ilang mga pamalaud sa hospital aron malikayan ang pag-contaminate sa maong virus.
Dugang usab niini nga andam usab ang ilang isolation area sa posibling PUI nga ilang masuta ug kompleto ang ilang Personal protective equipment kon PPEs sama sa suit, full mask, gloves, coat ug shoes cover.
Gilimitahan usab ang watcher sa matag pasyente nga ma admit sa mga balay tambalanan ug ang pagsulod sa bisita. Hangyo lang sa mga Medical staff, nga mo sunod sa insaktong pamaagi tungod kay para kini sa kaluwasan sa tanan.
Matud ni Dr. Calingasan nga alerto ug andam ang tanang Misamis Oriental Provincial Hospital sa pagsala sa mga pasyente nga makitaan og sintomas sa makamatay nga sakit. Dugang niini nga kanunay gamonitor si Gob. Bambi Emano sa kahimtang sa 8 ka provincial hospital ug kanunay gaabag sa ilang panginahanglanon.
Niadtong milabay nga adlaw, taliwala sa hulga sa COVID-19 nangita ug pamaagi si Gob. Bambi Emano aron mahinabi ang mga doctors sa mga balay tambalanan pinaagi sa video call aron i-monitor ang pagpangandam sa mga hospitals sa lalawigan.
Subling ngpahimangno si Gov. Emano nga kinahanglan magbalantayon kita sa atong kaugalingon ug mosunod sa mga pahimangno sa mga health workers, kapulisan ug mga lideres aron kita makalikay sa maong virus. (Misamis Oriental Provincial Information Office)
source https://pia.gov.ph/news/articles/1037432