Cebuano News: Iligan City mipalawig sa enhanced community quarantine hangtud Abril 30
ILIGAN CITY, Abril 9 (PIA) — Gipadayon sa lungsod sa Iligan ang pagpatuman sa enhanced community quarantine hangtud Abril 30, 2020.
Si City Mayor Celso Regencia mi-anunsyo atol sa press conference niadtong Huwebes nga ang pag-extend kon pagpalawig girekomenda sa Emergency Operations Center – Inter-Agency Task Force sa Iligan City, Iligan Medical Society, ug Mindanao State University-Iligan Institute of Technology aron maprotektahan ang mga katawhan sa maong epidemya.
Ang enhanced community quarantine gideklara nga implementar sugod niadtong bulan sa Marso ug matapos sa Abril 10, aron mapugngan ang pagkaylap sa makapatay nga coronavirus disease 2019 kon COVID-19.
Gipaklaro sa mayor nga ang mga probisyon, giya, ug mga lakang sa mi-aging mga Executive Order, EO 32 ug EO 33, magpabilin gihapon nga ipatuman.
Ubos sa EO 37 ni Regencia, gitakda ang dugang nga mga giya nga naglakip sa pagpatuman sa usa ka bag-ong iskedyul sa curfew alang sa mga menor de edad ug mga hamtong. Sa daan nga mando, ang curfew magsugod sa alas 6:00 sa hapon hangtod alas 6:00 sa buntag; pero karong bag-o nga EO, ang curfew nga iskedyul magsugod na sa alas 7:00 sa gabi-i hangtud alas 5:00 sa buntag.
Gimando-an ang mga residente nga magpabilin sa balay, gawas kung ang rason mahinungdanon kaayo o importante kaayo ang katuyo-an.
Samtang ang mga delivery trucks ug bisan unsang ga-karga ug nagdala sa mga nag unang panginahanglan (essential goods) gitugotan sa pagsulod sa lungsod.
Gipasidan-an sa mayor ang mga tag-iya sa pribado nga mga sakyanan nga dili magbutang sa note nga kuno maghatud sa mga essential goods aron lang makapanglimbong.
Ang mga dili motuman sa mando niining executive order mag-atubang sa kriminal, sibil, o administratibo nga kaso.
Agi’g tubag sa bag-ong EO, ang Incident Management Team (IMT) mag himo sa usa ka sentralisado nga ‘template’ alang sa home quarantine pass nga naay control number matag panimalay.
Si City Fire Marshal Butch Baulete, ang IMT Incident Commander, miingon nga nakadawat sila ug mga report nga naay mga panimalay nga nakakuha ug sobra sa usa ka Quarantine Pass diin wala na hinuon kini makatuman sa tumong sa paggamit sa Quarantine Pass tungod kay imbis usa ra kada panimalay ang pwede makagawas-gawas, nidaghan na hinuon kay daghan man ang gikuha nga “Passes” sa usa ka panimalay.
Usa lang gyod ka quarantine pass sa matag panimalay ang gitugotan sa syudad aron makapalit sa pagkaon, tambal, ug uban pang mga kinahanglanon. Tumong niini aron mapugngan ang pagkaylap sa gikahadlokan nga sakit.
Miingon siya nga mag-isyu ang IMT sa usa ka hini-usa nga template nga naay mga control number base sa usa ka master list nga gi-verify sa barangay.
Dugang pa ni Baulete nga gi-estudyohan usab karon sa IMT ang pag-iskedyul sa pagpamaligya sa matag barangay aron dili kaayo modaghan ang mga tawo sa merkado ug matabangan ang mga residente nga mapadayon ang pamatasan sa social distancing. (BGE/PIA-ICIC)
source https://pia.gov.ph/news/articles/1038562