Cebuano News: LGU Kauswagan nag andam ug kaugalingong ‘isolation facility’
KAUSWAGAN, Lanao del Norte, Abril 10 (PIA) — Hingpit nga gipangandaman sa lokal nga pangagamhanan niining lungsod ang ‘worst case scenario’ nga posibleng idalit niining coronavirus disease (COVID-19).
Sa panguna ni municipal mayor Rommel Arnado, nag muntar ang LGU ug usa ka “isolation facility” nga mahimong kabutangan sa mga persons under investigation (PUI) nga adunay bug-at nga mga sintomas.
Kining maong pasilidad mahimo usab temporaryong madayunan in-kasong adunay mupositibo sa maong makatakod nga sakit samtang magpaabot silang ma proseso sa Department of Health.
Ginama sa mga container vans, gi improbar, pinintalan ug fully airconditioned ang maong lugar.
Mapasigarbuhong gihayag ni Arnado nga makumpleto na kining pasilidad adlawng, Biyernes, Abril 10.
“Nakahulam kita niining mga gamit sa GNPK ug mao kini atong gi improve nga mga container vans. Sa Biyernes makumpleto na kini ug nagapasalamat kita sa maabtikong LGU department heads ug personnel,” matud pa ni Arnado.
Dugang pa sa alkalde, makatabang sa matag pamilya ang maong pasilidad.
“Kining maong pasilidad pabor gyud sa mga pamilya. Sa panahong adunay mga sintomas ang miyembro sa pamilya, kinahanglan gyud ma isolate sila aron dili matakdan tanan,” dugang ni Arnado.
Isumite sa LGU ang maong pasilidad ngadto sa DOH alang sa pag assess ug pag accredit niini aron hingpit na kining magamit.
Ang maong pasilidad kayang mudawat ug unom ngadto sa walo ka tawo ug kini idumala sa municipal health office (MHO) sa lungsod.
Kining maong proyekto gimugna isip local counterpart sa LGU ngadto sa inisyatiba sa nasyonal nga pangagamhanan ug suporta sa mga pagpaningkamot sa Provincial Government of Lanao del Norte.
Sa panahon nga mahuman na ang maong public health crisis, pagahimoong training facility ang maong lugar alang sa mga mag-uuma kabahin sa organic agriculture nga isa sa priority agenda ni Arnado ug sa LGU. (LGU Kauswagan/PIA ICIC)
source https://pia.gov.ph/news/articles/1038646